Польшча ўвяла санкцыі супраць беларускага бізнэсоўца Аляксандра Машэнскага

Гэтае рашэньне было прынята на запыт кіраўніка Нацыянальнай падатковай адміністрацыі і ўступіла ў сілу адразу.

У абгрунтаваньні рашэньня пазначана, што Аляксандар Машэнскі моцна зьвязаны з Аляксандрам Лукашэнкам. Гэтая сувязь асабістая, арганізацыйная, эканамічная і палітычная. Такім чынам, ягоная дзейнасьць ацэньваецца і як ускосная падтрымка вайны Расеі супраць Украіны.

За што Польшча ўвяла санкцыі супраць Машэнскага

• Машэнскі — уладальнік вядомых беларускіх кампаніяў «Санта Брэмар», «Савушкін прадукт» і «Санта Рытэйл», — гаворыцца ў дакумэнце.
• Ягоныя кампаніі атрымліваюць падатковыя льготы і мытныя прывілеі ў свабоднай эканамічнай зоне ў Берасьці.
• «Санта Брэмар» мела спэцыяльную ліцэнзію на імпарт рыбы ад адміністрацыі прэзыдэнта.
• «Савушкін прадукт» атрымаў кантроль над сыравіннай базай з 92 гаспадарак.
• Сам Аляксандар Лукашэнка асабіста дапамагаў Машэнскаму прасоўваць ягоны бізнэс на расейскім рынку.
• Машэнскі адкрыта падтрымліваў Лукашэнку на прэзыдэнцкіх выбарах у 2010 і 2020 гадах.
• Ён таксама быў сярод запрошаных на «таемную інаўгурацыю» Лукашэнкі пасьля выбараў 2020 году.
• У 2013 годзе Лукашэнка ўзнагародзіў яго ордэнам Айчыны III ступені.
• Машэнскі ўваходзіць у цэнтральную раду Прэзыдэнцкага спартовага клюбу, якім кіруе Дзьмітры Лукашэнка, сын прэзыдэнта.
• Таксама ён узначальвае Фэдэрацыю веславаньня, 90% бюджэту якой фінансуецца коштам ягоных прадпрыемстваў.
• За мінулыя дзесяць гадоў Машэнскі больш як 30 разоў карыстаўся дзяржаўнымі самалётамі беларускага ўраду для міжнародных паездак.

Якія меры ўведзеныя

• Усе грошы і эканамічныя актывы Аляксандра Машэнскага ў Польшчы замарожаныя.
• Забаронена перадаваць яму любыя фінансавыя сродкі або рэсурсы.
• Ён ня можа ўдзельнічаць у польскіх дзяржаўных закупках і конкурсах.
• Яго імя ўнесена ў сьпіс іншаземцаў, якім забаронены ўезд і знаходжаньне на тэрыторыі Польшчы.

Што вядома пра Аляксандра Машэнскага

Ён адзін з найбуйнейшых бізнэсоўцаў у Беларусі. Акрамя «Санта Брэмар» і «Савушкін прадукт», ён валодае сеткай «Санта Рытэйл», кампаніяй «Рускае мора» і іншымі актывамі.

У 2022 годзе Машэнскі жыў і працаваў у Варшаве з дазволу польскіх уладаў. Пра гэта паведамляў польскі тэлеканал TVN. У рэпартажы сьцьвярджалася, што ён здымае кватэру ў польскай сталіцы, вядзе там бізнэс і свабодна езьдзіць паміж Польшчай і Беларусьсю. Паводле польскіх журналістаў, ён карыстаўся «Мэрсэдэсам» з чырвонымі консульскімі нумарамі.

Машэнскі баяўся трапіць пад санкцыі, але больш за 10 гадоў рэжым Лукашэнкі дапамагаў яму гэтага ўнікнуць, адзначаў TVN. Раней ад санкцыяў яго ратавалі ісьляндзкія палітыкі (Машэнскі ў сярэдзіне 2000-х стаў ганаровым консулам Ісьляндыі). У 2022 годзе ўключэньне яго ў санкцыйны сьпіс Эўразьвязу заблякавала Вугоршчына.

У жніўні 2022 году ва Ўкраіне арыштавалі актывы кампаніі «Санта Холод Україна». Гэтай кампаніяй валодае Яна Машэнская, дачка Аляксандра Машэнскага.

У 2025 годзе выданьне «Беларусы і рынак» паставіла Машэнскага на другую пазыцыю ў рэйтынгу самых пасьпяховых бізнэсоўцаў Беларусі. Ягоны малочны бізнэс — трэці паводле продажаў у Расеі і Беларусі, ён уваходзіць у топ-50 замежных бізнэсаў у Расеі паводле Forbes.